Agndofa gestir eftir fróðlega heimsókn

Í vikunni fór hópur fulltrúa aðildarfyrirtækja markaðsstofunnar í heimsókn til Flúrlampa, líka nefnt lampar.is, á Reykjavíkurveginum. Eigendurnir Jóhann Lúðvík Haraldsson og Elma Björk Júlíusdóttir tóku á móti okkur, sögðu frá starfseminni og leiddu hópinn um allt fyrirtækið.

Ástríða fyrir verkefnunum

Flúrlampar rekja sögu sína allt aftur til ársins 1977 en Jóhann keypti fyrirtækið árið 2003 og töluverð þróun hefur átt sér stað á undanförnum árum. Þau voru áður til húsa á Kaplahrauni en fluttu á Reykjavíkurveginn árið 2017 og eru þar núna með um 1000 fermetra húsnæði og þyrftu helst að bæta við sig enn fleiri fermetrum.

Á fyrstu hæð er verslun, lager og skrifstofur en smásalan er einungis lítill hluti af starfseminni. Sérstaða þeirra byggist einna helst á getunni til að sérsmíða lampa fyrir ólíkar aðstæður og viðgerðum og endurbótum á eldri lömpum. Stór hluti starfseminnar eru ljósastýringar fyrir minni og stærri byggingar, en það er forritanlegur stjórnbúnaður fyrir lýsingu. Listinn yfir þær byggingar sem fyrirtækið hefur unnið í var ansi langur en þar á meðal er Harpan, Laugardalshöll, Bláa Lónið og fjöldinn allur af skólum, verslunarmiðstöðvum og hótelum auk fjölda einkaheimila.

Jóhann sagði frá verkefnum fyrirtækisins af mikilli ástríðu og stolti og nefndi sem dæmi að þau hefðu nýverið smíðað stærsta lampa sem þau hafa nokkurn tímann smíðað fyrir sýningarnar Ellen B og Ex sem eru um þessar mundir í Þjóðleikhúsinu. Þá má með sanni segja að gestirnir hafi verið hálf agndofa yfir öllu því sem fyrirtækið gerir.

Þarf ekki alltaf að kaupa nýtt

Eftir kynningu Jóhanns fór hópurinn niður í kjallara hússins þar sem finna má framleiðsludeildina og verkstæði. Þar eru ljós smíðuð frá grunni og nýir ljósgjafar settir í gömul ljós. „Það þarf ekki alltaf að kaupa nýtt“, sagði Jóhann ítrekað og sýndi sem dæmi útiljós sem eigendur héldu að þau þyrftu að henda en var nú búið að hreinsa og duftlakka og setja í nýjan led ljósgjafa.

Þarna mátti líka finna stórt dufthúðunarverkstæði þar sem ljós, handrið og ýmislegt fleira er dufthúðað í næstum öllum regnbogans litum.  

Fundir framundan

Við þökkum Jóhanni og Elmu fyrir að taka á móti okkur. Það var afar áhugavert að heyra um allt hugvitið og reynsluna sem fyrirtækið hefur yfir að búa. Við teljum nokkuð víst að nokkrir af þeim gestum sem komu bóki fund hjá Flúrlömpum fljótlega.