Back to All Events

Bóka- og bíóhátíð barnanna tileinkuð Guðrúnu Helgadóttur


Bóka- og bíóhátíð er menningarhátíð fyrir börn í Hafnarfirði þar sem áhersla er lögð á bækur og kvikmyndir. Tilgangur hátíðarinnar er að efla áhuga barna á lestri og læsi í víðum skilningi og styður þannig við læsisverkefni leik- og grunnskóla bæjarins.

Menningarhátíðin er haldin í mars í nánu samstarfi Hafnarfjarðarbæjar við Bókasafn Hafnarfjarðar, grunnskóla, leikskóla, Bæjarbíó og fleiri aðila. Yfirlýst markmið hátíðar er að hvetja börn á öllum aldri til virkrar þátttöku í uppbyggjandi og áhugaverðum læsis- og menningarverkefnum og –viðburðum meðan á hátíðinni stendur. 

Bóka- og bíóhátíð barnanna í Hafnarfirði er haldin í þriðja skipti. Hátíðin í ár verður helguð Guðrúnu Helgadóttur, rithöfundi og Hafnfirðingi.  Guðrúnu þarf vart að kynna fyrir nokkrum núlifandi íslendingi en eftir hana liggja persónur sem þjóðin hefur lært að elska í gegnum árin eins og Páll Vilhjálmsson, tvíburabræðurnir Jón Oddur og Jón Bjarni og þannig mæti lengi telja en titlar hennar telja á þriðja tug verka auk fjögra leikrita eða leikverka. Þannig öðlaðist hún sinn sess í  sem einn ástsælasti rithöfundur okkar tíma.

Hátíðin verður opnuð föstudaginn 16. mars. Helgina 17.-18. mars munu verða viðburðir í nokkrum stofnunum bæjarins og í Bæjarbíó. Kennsluvikuna á eftir mun hátíðin halda áfram í leik- og grunnskólum bæjarins. Markmiðið með Bóka- og bíóvikunni er að minna á mikilvægi lestrar og bóka og tengsl þeirra við kvikmyndir.

Sérstök áhersla verður einnig á þá höfunda sem nú búa og eru virkir í skrifum fyrir unga lesendur eins og Gunnar Helgason leikara og rithöfund sem býr í Hafnarfirði. Það vill svo skemmtilega til að mynd eftir bókinni hans Víti í Vestmannaeyjum verður frumsýnd 23. Mars næst komandi og ætla söguhetjur úr henni að koma og bregða á leik og skora á Hafnfirska krakka í vítaspyrnukeppni á laugardaginn kl 13:00 á undan sérstakri viðhafnar bíósýningu á Jóni Oddi og Jóni Bjarnar sem haldið verður í Bæjarbíó kl 14:00

Þá mun Bergrún Íris Sævarsdóttir barnabókahöfundur frá Hafnarfirði stýra opnunarhátíðinni en verk hennar hafa fengið mikið lof gagnrýnenda og verðlaunatilnefningar.

Föstudagur 16. mars
Kl. 9:30 og 10:30 Opnunarhátíð í Bæjarbíó Ávarp, upplestur, bíóbrot og tónlistaratriði fyrir elstu leikskólabörn bæjarins með áherslu á höfundarverk Guðrúnar Helgadóttur.

Laugardagur 17. mars
Kl. 12:30 og 16:00 Tónleikar í Víðistaðakirkju Opnir tónleikar yngri og eldri kóra á Barnakóramóti Hafnarfjarðar í Víðistaðakirkju.

Kl. 13:00 Vítaspyrnukeppni við bókasafnið Leikararar úr Víti í Vestmannaeyjum verja.

Kl. 14:00 Bíósýning í Bæjarbíó

Sýnd verður kvikmyndin Jón Oddur og Jón Bjarni eftir samnefndri sögu Guðrúnar Helgadóttur.

Á undan myndinni verður myndbrot úr kvikmyndinni Víti í Vestmannaeyjum frumsýnt.

Alla vikuna

• Fjölbreytt dagskrá í leik- og grunnskólum.

• Útlánaleikur á bókasafninu: Allir sem taka barnabækur að láni geta tekið þátt í útlánaleik.

Verðlaun fyrir heppna lestrarhesta.

• Útstillingar á bókum og bíómyndum gerðum eftir þeim í bókasafninu.

• Ljóð úr bókakjölum: Gestir á barna- og unglingadeild bókasafnsins geta spreytt sig á að búa til ljóð úr bókatitlum.

 

Sunnudagur 18. mars

Kl. 11:00 Söguganga frá Gúttó

Leifur Helgason leiðir göngu um sögusvið bóka Guðrúnar Helgadóttur á vegum Byggðasafnsins.

Kl. 14-17 Fjölskyldusmiðja í Hafnarborg

Lóa Hjálmtýsdóttir leiðir teikni- og textasmiðju.

Mánudagur 19. mars

Kl. 17 Bókabingó í Bókasafninu

Bókavinningar í boði fyrir heppna bingóspilara.

Þriðjudagur 20. mars

Kl. 10:30 Bókabingó á foreldramorgni

Foreldrar með ung börn og bumbur

hjartanlega velkomin.

Björt í sumarhúsi

Söngleikur fyrir 2. bekkinga í Bæjarbíó.

Fimmtudagur 22. mars

Kl. 17-18 Spunasögustund á bókasafninu

Sögð verður spunasaga í samvinnu við

áheyrendur sem hjálpa til við persónusköpun.