Í Hafnarfirði starfa hundruðir fyrirtækja. Markmið markaðsstofunnar er að sýna kraftinn, sköpunina og fjölbreytnina í atvinnulífi bæjarins og vekja athygli á fjölbreyttri og spennandi starfsemi fyrirtækja í Hafnarfirði, með það að leiðarljósi að bæta ímynd Hafnarfjarðar og auka eftirspurn eftir hvers konar þjónustu og atvinnustarfsemi á svæðinu.

Í Markaðsstofu Hafnarfjarðar eru nú um 200 fyrirtæki og eru þau af öllum toga. Við viljum vera fyrir öll fyrirtæki í Hafnarfirði, hvort sem þau eru stór eða lítil, einyrkjar eða listamenn. Við kappkostum því að hafa fjölbreytta dagskrá svo það sé eitthvað fyrir alla. Við viljum skapa samfélag fyrirtækja, fyrirtækjaeiganda og starfsmanna þar sem aðildarfélögum gefst tækifæri á að miðla, tengjast og fræðast.

Við höfum verið að leggja meiri þunga síðustu misseri í hvernig við getum kynnt fyrirtækin betur út á við, með viðburðum, samhentu markaðsátaki eða efnissköpun. Eitt af okkar helstu markmiðum er að fjölga fyrirtækjum í Markaðsstofunni og leggja meiri áherslu á að mæta ólíkum þörfum þeirra.

Við teljum mikilvægt að auka enn frekar samvinnu við Hafnarfjarðarbæ, því þannig getum við aukið skilvirkni, stutt og ýtt undir starf hvors annars. Með því að greina fleiri samlegðaráhrif samstarfsins gerir okkur kleypt að halda stærri viðburði, nýta betur innviði, fjármagn og ekki síður styðja við stefnu bæjarins um blómlegt atvinnulíf í Hafnarfirði. Heimsmarkmið sameinuðuþjóðanna er höfð í forgrunni í stefnu bæjarins og viljum við leggja okkar að mörkum í því að innleiða Heimsmarkmiðin og hvetja okkar fyrirtæki til að gera slíkt hið sama.

Velgengni Íslands í innleiðingu heimsmarkmiða Sameinuðuþjóðanna veltur á að tryggja þátttöku sveitarfélaga, fyrirtækja, félagasamtaka og einstaklinga. Við hjá MSH viljum leggja okkar að mörkum og eins hvetja okkar aðildarfyrirtæki í því að vinna að heimsmarkmiðunum því saman náum við árangri og tryggjum betra samfélag.

Markaðsstofan stendur fyrir öflugri dagskrá með ólíkum viðburðum á hverju misseri sem styðja við markmið markaðsstofunnar.

Dagskráin samanstendur annars vegar af viðburðum fyrir aðildarfélaga, af fræðslu og fróðleik, við sköpum vettvang til tengslamyndunar og þá sérstaklega fyrir lítil fyrirtæki og einyrkja ásamt viðburðum sem eru með það markmið að hafa gaman saman.

Nýsköpun og þróun er grunnur að vexti í víðu samhengi. Við gerum nýsköpun hátt undir höfði hvort sem það er að hvetja og efla til nýsköpunar, styðja við nýsköpunarfyrirtæki, bjóða nýsköpunarfyrirtækjum að vera með í MSH að kostnaðarlausu eða bjóða upp á fræðslu tengda nýsköpun

Markaðsstofan kynnir með stolti Hafnarfjarðarkortið, sem er ný og spennandi lausn fyrir íbúa og fyrirtæki í Hafnarfirði. Hafnarfjarðarkortið er gjafa- og inneignarkort sem hægt er að nota í fjölmörgum verslunum, þjónustufyrirtækjum, kaffihúsum og veitingastöðum víðs vegar um bæinn. Kortið virkar eins og Kringlukortið nema í Hafnarfirði.

Kortið virkar eins og inneignarkort, þú velur upphæðina og viðtakandinn ákveður hvar hann nýtir hana. Þannig gefur þú gjöf sem gleður og hefur á sama tíma gildi í samfélaginu. Með Hafnarfjarðarkortinu styður þú við fyrirtækin í heimabænum og hjálpar til við að efla verslun og þjónustu í Hafnarfirði um leið og þú gleður þann sem þér þykir vænt um.

Kortið er virkt í Apple wallet og Android farsímum og þú þarft aldrei aftur að muna eftir gjafakortinu þínu.

Stofuspjallið er nýtt og spennandi hlaðvarp á vegum Markaðsstofu Hafnarfjarðar sem gefur einstaka innsýn í fólkið sem stendur á bakvið fyrirtækin í Hafnarfirði. Við heyrum heillandi sögur, kynnumst hugmyndafræði og metnaði eigenda og skoðum spennandi starfsemi fyrirtækjanna. Vertu með og uppgötvaðu kraftinn og sköpunargleðina sem gerir Hafnarfjörð sérstakan.

Hvatningarverðlaun markaðsstofunnar voru fyrst afhent árið 2017 en þau verðlaun eru núna nefnd Fyrirtæki ársins í Hafnarfirði. Verðlaun og viðurkenningar eru veittar fyrirtækjum sem hafa skarað framúr, vakið eftirtekt fyrir störf sín eða lyft upp bæjaranda Hafnarfjarðar með starfsemi sinni og athöfnum. Þau eru þakklætisvottur fyrir óeigingjarnt starf við að gera Hafnarfjörð að betra samfélagi.